Inkuru idasanzwe y’Abapolisi b’u Rwanda barangije ubutumwa muri Centrafrique

Mu gihe isi ikeneye amahoro kurusha ikindi gihe cyose, hari abagabo n’abagore b’Abanyarwanda bahisemo kwitanga, bagasiga ibyabo bakajya kubungabunga ituze n’umutekano mu bihugu byugarijwe n’intambara.

Ni muri urwo rwego abapolisi 160 bagize itsinda RWAFPU2-9, barangije ubutumwa bw’umwaka umwe mu gihugu cya Repubulika ya Centrafrique, bagarutse mu Rwanda nyuma yo kurangiza neza inshingano zabo z’ubutwari n’ubwitange.

Bakiriwe ku kibuga cy’indege mpuzamahanga cya Kigali, i Kanombe, ku wa 8 Gicurasi 2025, n’ubuyobozi bwa Polisi y’u Rwanda, aho bwabashimiye ku murava n’imyitwarire y’indashyikirwa babereye icyitegererezo. CP Yahya Kamunuga, wari uhagarariye Polisi y’u Rwanda, yavuze ko aba bapolisi basize inkovu y’ubutwari aho banyuze, kandi ko bageze igihe cyo gukomeza umusanzu wabo n’imbere mu gihugu.

Ntibacunze gusa umutekano, banacunguye imibereho y’abaturage

SSP Boniface Kagenza, wari Umuyobozi wungirije w’itsinda RWAFPU2-9, yavuze ko uretse inshingano zo kubungabunga amahoro, banagize uruhare mu bikorwa by’iterambere n’imibereho myiza.

Ati: "Twafatanyije n’abaturage mu bikorwa by’umuganda, dufasha abana batishoboye kubona ibikoresho by’ishuri, kandi ibyo byose byaduhesheje icyizere no kongera ubufatanye mu gucunga umutekano."

Ni ibikorwa byarenze imbibi z’ubupolisi bisanzwe, bigaragaza ko ubutumwa bw’amahoro butagamije gusa gucunga imbunda, ahubwo bunubaka icyizere n’iterambere risangiwe n’abaturage.

Batanze urugero, baha abandi icyerekezo

Iri tsinda risimbuwe n’irindi rishya RWAFPU2-10, naryo ryahagurutse mu Rwanda rigiye gukomeza ubutumwa bw’Umuryango w’Abibumbye (MINUSCA). Mu gihe isi ikomeje guhura n’ibibazo by’umutekano mucye, ubutumwa nk’ubu ni icyerekezo cyiza cy’uko u Rwanda rutanga umusanzu warwo mu kubaka amahoro arambye.

Aba bapolisi bagarutse bafite uburambe butazigera bujya ubusa, ndetse biyemeje gukomeza gutanga umusanzu mu gucungira Abanyarwanda umutekano wuzuye ubushishozi, ubunyamwuga n’indangagaciro z’Inkeragutabara z’amahoro.

Nsengimana Donatien |Ijambo.net